جوبا ەرەكشە قاجەتتىلىكتەرى بار ادامدارعا كومپيۋتەرلىك ساۋاتتىلىقتى ۇيرەنىپ قانا قويماي, ماماندىق الۋعا دا كومەكتەسەدى. جوباعا قاتىسۋشىلار كەيىننەن تالىمگەرلىكپەن جالعاساتىن وقۋدان باستاپ جۇمىسقا ورنالاسۋعا دەيىن تولىق تسيكلدەن وتەدى.
ءبىلىم بەرۋ باعدارلاماسىنا كومپيۋتەرلىك ساۋاتتىلىقتىڭ بازالىق داعدىلارى, گرافيكالىق ديزاين, تيپوگرافيا جانە SMM-مەنەدجمەنت كىرەدى. باعدارلاما ەڭبەك نارىعىندا سۇرانىسقا يە ماماندىقتاردى قامتيدى. جوباعا قاتىسۋشىلار وقۋدى اياقتاعاننان كەيىن جۇمىسقا ورنالاسا الادى.
"قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەلىمىزدە 695 000 استام مۇگەدەك ادام تۇرادى, بۇل رەتتە 424 000 ادام ەڭبەككە قابىلەتتى جاستا. الايدا ولاردىڭ تورتتەن ءبىر بولىگى عانا ەڭبەك قىزمەتىنە تارتىلعان. ءبىزدىڭ جوبا ەرەكشە قاجەتتىلىكتەرى بار ادامدارعا الەۋمەتتەنۋگە, سۇرانىسقا يە ماماندىق الۋعا جانە جۇمىس تابۋعا كومەكتەسەدى", - دەدى "ەرەكشە تاڭداۋ-شەلەك" كق باعدارلامالىق ديرەكتورى زاحيرا بەگاليەۆا.
ونىڭ ايتۋىنشا, وقۋعا 137 ادام ءوتىنىش بەرگەن.
كورپوراتيۆتىك قور "Samruk-Kazyna Trust" الەۋمەتتىك جوبالاردى دامىتۋ قورىمەن بىرلەسىپ "LIDER Z" جوباسىنا باستاما جاسادى.
ۇيىمداستىرۋشىلار قوعامدا مۇمكىندىگى شەكتەۋلى جاندارعا قاتىستى ستيگماتيزاتسيا ءالى دە بار ەكەنىن اتاپ ءوتتى. ويتكەنى, كوپتەگەن جۇمىس بەرۋشىلەر ولاردى بەلگىلى ءبىر سالادا جەتكىلىكتى بىلىكتى ەمەس دەپ سانايدى, سەبەبى جەتىستىككە جەتكەن جانە ونەگە تۇتار جاندار سانى از. ال وسى "LIDER Z" جوباسى بۇل ماسەلەنى شەشۋگە مۇمكىندىك بەرەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
